እወ እንተ ኾይኑ፡ ምስዓል ልሙድን ብብዙሕ ብዝተፈላለየ ምኽንያታትን ክኸውን ይኽእል እዩ። ምስዓል ናይ መከላኸሊ ግብረ-መልሲ ኾይኑ ገለ ነገር ኣብ መስተንፈሲ ኣካላት ንዘሎ ልፋጫዊ መምብራና ኣብ ዘነድረሉ እዋን ዝጅምር እዩ። ባህሪ ዝቕይርን ብጣዕሚ ዘሳቕይን ወይ ከም ”ንነዊሕ ግዜ ዝጸንሓ ጕንፋዕ” ኮይኑ ዝስምዓኻ ምስዓል ኵሉ ግዜ ብሓደ ሓኪም ክምርመር ይግብኦ።

እወ እንተ ኾይኑ፡ ዓኽታኻ ከም ዝዛየደ ኮይኑ እንተ ተሰሚዑካ፡ ምኽንያቱ ኣብ ደረቕን ዶራንን ቦታታት ብምጽናሕካ ክኸውን ይኽእል እዩ፣ ይኹን’ምበር ብምኽንያት ነድሪ መስተንፈሲ ኣካላት እውን ክኸውን ይኽእል እዩ። ምኽንያቱ ንምርግጋጽ ምስ ማእከል ክንክን ጥዕናኻ ተራኺብካ ንኽትምርመር ክትሓቶም ጽቡቕ እዩ።

እወ እንተ ኾይኑ፡ ጺጽ ዝብል/ዝፋጺ ድምጺ መብዛሕትኡ ግዜ ሻምብቆ ምስትንፋስ ክጭበጥ ከሎን ዋሕዚ ንፋስ ክድረት ከሎን እዩ ዘጋጥም። እዚ ብምኽንያት ኣዝማ፡ ነ’ባር ሕማም ሳንቡእ ወይ ረኽሲ መስተንፈሲ ኣካላት ክኸውን ይኽእል እዩ። ከምኡ’ውን ብምኽንያት ካልኦት ናይ ልቢ ወይ ሳንቡእ ሕማማት እውን ክኸውን ይኽእል እዩ። ከምዚ ዓይነት ምልክት ሕማም ይስምዓካ እንተ ኣሎ ኾይኑ ንቐጻሊ መርመራ ምስ ኣገልግሎት ሕክምና ርክብ ክትገብር ኣሎካ።

እወ እንተ ኾይኑ፡ ተደጋጋሚ/ንነዊሕ ዝጸንሕ ጸገም ናይ መስተንፈሲ ኣካላት ዝገብረልካ እንተ ኾይኑ ምስ ኣገልግሎት ሕክምና ክትራኸብ ኣሎካ። ጸገም ምስትንፋስ እንተ ገይሩልካ፡ ልዑል ረስኑ እንተ ኣለካ ኾይኑን ሓፈሻዊ ኵነታት ጥዕናኻ እንተ ብኢሱን ቀልጢፍካ ምስ ኣገልግሎት ሕክምና ርክብ ግበር። ተመላላሲ ረኽሲ እንተ ዝገብረልካ ኾይኑ፡ እዚ ካልኦት ናይ ሳንቡእ ሕማማት ከመልክት ስለ ዝኽእል ምናልባት ኣብ ናይ ሳንቡእ ክሊኒክ ብዝበለጸ ክምርመር ኣለዎ።

እወ እንተ ኾይኑ፡ ብዙሓት ሰባት ምኽንያት ትንፋስ ምሕጻር ካብ ድኹም ብቕዓት ኣካላት ወይ ካብ መጠን ንላዕሊ ርጕዲ እዩ ኢሎም እዮም ዝኣምኑ። ኣብ ፈዅስ ጻዕሪ ወይ ኣብ እዋን ዕረፍቲ ትንፋስ ይሓጽረካ እንተ ኾይኑ ናይ ልቢ ወይ ናይ ሳንቡእ ሕማም ከመልክት ስለ ዝኽእል ቀልጢፍካ ምስ ኣገልግሎት ሕክምና ርክብ ክትገብር ኣሎካ።.

እወ እንተ ኾይኑ፡ ዶሮና፡ ጋዛት፡ ራዶን ወይ ኣስበትስ ንውሽጢ ምስትንፋስ ንጥዕናና ኣብ ሓደጋ የእትዎ እዩ። መስተንፈሲ ኣካላትና ናይ መኸላኸሊ ሜላታት ኣለዎ። ይኹን’ምበር እዞም ሜላታት ንነዊሕ ግዜ ምስ ትቃላዕ እኹላት ከይኮኑ ይኽእሉ እዮም።

እወ እንተ ኾይኑ፡ ትምባኾ ምትካኽ፡ንብዙሕ ዓይነት መንሹሮ፡ ናይ ልብን ሰራውር ደምን ሕማማት፡ ሕማም ሽኮርን ረኽሲ ኣብ መስተንፈሲ ኣካላትን ሓዊስኻ ብዙሕ ሕማማት ንኽትሓምም ዘሎ ተኽእሎ የዛይዶ እዩ። ምትካኽ ሽጋራ ምቍራጽ ኵሉ ግዜ ናይ ጥዕና ረብሓ ይህብን ወትሩ ጽቡቕን እዩ። ንዓኻ ምትካኽ ሽጋራ ከተቋርጽ እትደሊ፡ ኣገልግሎት ጥዕና ናይ ደገፍን ሓገዝን ዕድል ክህበካ ይኽእል እዩ። ሽጋራ ምትካኽ ኣቋሪጽካዮ እንተ ዄንካ፡ እንቋዕ ሓጐሰካ! ንጥዕናኻ ሓደ ኣዚዩ ጽቡቕ ነገር ኢኻ ገርካ፡ ካብ ምትካኽ ናጻ ምዃን ቀጽሎ።

እወ እንተ ኾይኑ፡ ደም ትስዕል እንተ ኣለኻ ዄንካ ብምኽንያት ነድሪ ወይ ረኽሲ ኣብ ስርዓተ ምስትንፋስ ክኸውን ይኽእል እዩ። ይኹን’ምበር እዚ ምልክት ሕማም ብኻልኦት ምኽንያታት እውን ክግለጽ ይኽእል እዩ፣ መንሹሮ ሓደ ካብ ምኽንያታት ኮይኑ ብኣገልግሎት ሕክምና ብዝግበር መርመራ ካብ ግምት ክውገድ ኣለዎ።